خطے کو امریکا اور اسرائیل کیلئے جہنم بنا دیں، ٹرمپ کی دھمکی پر ایران کا جواب

کمانڈر پاسداران انقلاب میجر جنرل علی عبداللہی نے کہا ہے کہ ایران کے بنیادی ڈھانچے پرحملہ ہوا توعبرت کانشان دیں گے ۔

ایرانی پاسدارانِ انقلاب کے کمانڈرنے خبردار کیا ہے کہ اگر ایران کے بنیادی ڈھانچے کو نشانہ بنایا گیا تو اس کا بھرپور اور عبرتناک جواب دیا جائے گا۔ انہوں نے کہا کہ جارحیت کی صورت میں امریکا اور اسرائیل کیلئے جہنم کے دروازے کھول دیے جائیں گے۔

ایرانی کمانڈر میجر جنرل علی عبداللہی کا کہنا ہے کہ امریکہ شکستوں کے بعد ایران کے قومی اثاثوں کو دھمکیاں دے رہا ہے، تاہم ایران نے جنگ کے آغاز سے جو مؤقف اپنایا تھا، اس پر مکمل عمل کیا گیا ہے۔

ترجمان پاسدارانِ انقلاب ابراہیم ذوالفقاری نے بھی واضح کیا کہ کسی بھی مزید جارحیت کا جواب صرف محدود نہیں ہوگا بلکہ پورے خطے میں شدید ردعمل کی صورت میں سامنے آئے گا۔

ان کا کہنا تھا کہ ایران کو شکست دینے کا خواب دیکھنے والے اب خود مشکلات میں گھر چکے ہیں اور صورتحال ان کے قابو سے باہر ہوتی جا رہی ہے۔

ترجمان ابراہیم ذوالفقاری نے مزید کہا کہ ایران اپنے دفاع کے لیے ہر ممکن قدم اٹھانے کی صلاحیت رکھتا ہے اور کسی بھی خطرے کا منہ توڑ جواب دیا جائے گا۔

ایران نے معاہدہ نہ کیا تو اسے تباہی کی طرف دھکیل دیا جائے گا، ٹرمپ

واضح رہے کہ ایران کی جانب سے یہ بیانات ایک ایسے وقت میں سامنے آئے ہیں جب ٹرمپ نے ایران کو دھمکی دی ہے کہ ایران 48 گھنٹوں میں معاہدہ کر لے یا آبنائے ہرمز کھول دے ورنہ اس پر قیامت ٹوٹ پڑے گی۔