نوان تھشارا نے سری لنکن کرکٹ بورڈ سے معافی مانگ لی

سری لنکا کے فاسٹ بولر نوان تھشارا نے سری لنکن کرکٹ بورڈ سے باضابطہ معافی مانگتے ہوئے بورڈ کے خلاف دائر قانونی کارروائی واپس لینے کا اعلان کر دیا ہے۔

سری لنکن میڈیا رپورٹس کے مطابق 31 سالہ کرکٹر نے ای میل کے ذریعے اپنا مؤقف واضح کیا اور معاملہ خوش اسلوبی سے حل کرنے کی خواہش ظاہر کی۔

نوان تھشارا نے اپنے پیغام میں کہا کہ ان کا مقصد شفافیت اور انصاف کا حصول تھا، تاہم اس دوران اگر کرکٹ بورڈ یا متعلقہ حکام کو کسی قسم کی تکلیف، غلط فہمی یا پریشانی کا سامنا کرنا پڑا تو وہ اس پر دلی معذرت کرتے ہیں۔

پی ایس ایل11، پنڈیز کی ہار نہ رک سکی، کوئٹہ نے میدان لوٹ لیا

انہوں نے اس عزم کا اظہار بھی کیا کہ وہ مستقبل میں معاملات کو باہمی احترام اور افہام و تفہیم سے حل کرنے کے خواہاں ہیں۔

واضح رہے کہ نوان تھشارا نے لیگ میں شرکت کے لیے این او سی نہ ملنے پر بورڈ کے خلاف عدالت سے رجوع کیا تھا، جس کے بعد یہ تنازع سامنے آیا۔

اب کرکٹر کی جانب سے قانونی کارروائی واپس لینے کے اعلان کو دونوں فریقین کے درمیان کشیدگی میں کمی کی جانب اہم پیش رفت قرار دیا جا رہا ہے۔