فاسٹ گیند کے خطرے سے بچاؤ کیلئے کین ولیمسن نے نیا برانڈ متعارف کرا دیا

نیوزی لینڈ کے اسٹار بلے باز کین ولیمسن نے کرکٹ کھلاڑیوں کے تحفظ کیلئے ایک نئی کاروباری لائن متعارف کرا دی ہے، جس میں بلے بازوں کیلئے خاص حفاظتی سامان شامل ہے۔

کین ولیمسن نے ایک بیان میں بتایا کہ 2012 میں جنوبی افریقہ کے فاسٹ بولر ڈیل اسٹین کی ایک تیز گیند ان کے حفاظتی سامان سے ٹکرائی جس سے وہ ٹوٹ گیا اور انہیں شدید تکلیف کا سامنا کرنا پڑا۔

ان کے مطابق اسی واقعے نے انہیں یہ احساس دلایا کہ جدید کرکٹ میں استعمال ہونے والا حفاظتی سامان کھلاڑیوں کو مکمل تحفظ فراہم نہیں کر پا رہا، جس کے بعد انہوں نے “کور” نامی برانڈ کے تحت نئی مصنوعات متعارف کرانے کا فیصلہ کیا۔

کمپنی کے شریک بانی جیسن لو کے مطابق اس حفاظتی سامان میں خاص الائے دھات استعمال کی گئی ہے جو 200 کلومیٹر فی گھنٹہ سے زیادہ رفتار سے آنے والی گیند کو بھی برداشت کرنے کی صلاحیت رکھتی ہے۔

ان کا کہنا ہے کہ یہ سامان نہ صرف کرکٹ بلکہ ہاکی، بیس بال اور دیگر سخت گیند سے کھیلے جانے والے کھیلوں میں بھی استعمال کیا جا سکتا ہے۔

واضح رہے کہ کرکٹ میں بلے بازوں کیلئے یہ حفاظتی سامان طویل عرصے سے لازمی تصور کیا جاتا ہے، تاہم تیز رفتار گیند لگنے کے باعث کھلاڑی اب بھی شدید تکلیف کا سامنا کر لیتے ہیں۔

حال ہی میں آسٹریلیا کے ٹی ٹوئنٹی کپتان مچل مارش بھی تربیتی سیشن کے دوران گیند لگنے کے باعث زخمی ہو گئے تھے جس کے بعد انہیں عالمی کپ کے دو میچز سے باہر ہونا پڑا۔