مسلمانوں کو نہ چھیڑو، اگر چھیڑو گے تو ہم چھوڑیں گے نہیں، گورنر سندھ

کراچی: گورنر سندھ کامران خان ٹیسوری نے کہا ہے کہ ایران پر اسرائیل کا حملہ دراصل مسلمانوں کی قوت کو للکارنے کے مترادف ہے۔ مسلمانوں کو نہ چھیڑو، اگر چھیڑو گے تو ہم چھوڑیں گے نہیں۔

گورنر سندھ کامران خان ٹیسوری نے تقریب سے خطاب کرتے ہوئے کہا کہ افغانستان سے پہلے بھی کہا تھا کہ اپنی سرزمین دہشت گردی کے لیے استعمال نہ ہونے دیں۔ پاکستان نے افغان عوام کی بہت مدد کی مگر اب یہ برداشت نہیں کیا جا سکتا کہ پاکستان کے خلاف دہشت گردی ہو اور ہم خاموش رہیں۔

انہوں نے کہا کہ پاکستان افغانستان میں موجود دہشت گردوں کا مقابلہ کر رہا ہے۔ اگر مسلمانوں کو چھیڑا گیا تو بھرپور جواب دیا جائے گا۔ فیلڈ مارشل عاصم منیر کی قیادت میں پاک فوج نے پیشہ ورانہ صلاحیتوں کا بھرپور مظاہرہ کیا۔ اور جب بھارت نے پاکستان کو چھیڑا تو اسے بھرپور جواب دیا گیا۔

گورنر سندھ نے کہا کہ وہ امریکی صدر ڈونلڈ ٹرمپ کا شکریہ ادا کرتے ہیں۔ جو بتدریج حقائق سامنے لا رہے ہیں۔ انہوں نے افغان عوام سے اپیل کی کہ وہ اپنی حکومت کو سمجھائیں کیونکہ پاکستان نے اس وقت بھی اپنے دروازے کھولے جب دنیا نے بند کر دیئے تھے۔

انہوں نے کہا کہ پاکستان نے افغان حکومت کو بارہا آگاہ کیا کہ پاکستان میں دہشت گردی کرنے والے عناصر افغانستان میں پناہ لیے ہوئے ہیں۔ کارروائیوں کے بعد دہشت گرد اپنی کمین گاہیں چھوڑ کر بھاگنے پر مجبور ہو گئے ہیں۔

کامران ٹیسوری نے مزید کہا کہ پاکستان نے افغانستان کے ساتھ اچھے تعلقات کی کوشش کی۔ مگر افغان حکومت نے دہشت گردوں کو پناہ دی۔ انہوں نے الزام لگایا کہ بھارت بلوچستان میں دہشت گردی میں ملوث ہے۔ اور جب بھی پاکستان میں غیر ملکی سرمایہ کاری آتی ہے تو بھارت دہشت گردی کرواتا ہے۔

یہ بھی پڑھیں: پی آئی اے کو امارات کیلئے پروازوں کی اجازت مل گئی، فلائٹ شیڈول جاری

انہوں نے کہا کہ پاکستان کی طرف میلی آنکھ سے دیکھنے والوں کو نیست و نابود کر دیا جائے گا۔ جبکہ حکومت اور عسکری قیادت ملک میں معاشی استحکام کے لیے کوششیں کر رہی ہیں۔