شہباز شریف اور ایرانی صدر کا ٹیلیفونک رابطہ، مسعود پزشکیان نے مذاکرات کی دعوت قبول کر لی

شہباز شریف اور ایرانی صدر پزشکیان کے درمیان ٹیلی فونک رابطے میں ایران نے اسلام آباد میں مذاکرات کی دعوت قبول کر لی ہے۔

شہباز شریف نے اسلامی جمہوریہ ایران کے صدر مسعود پزشکیان سے ٹیلیفونک گفتگو کی، جو تقریباً پینتالیس منٹ سے زائد جاری رہی۔

اس خوشگوار اور دوستانہ گفتگو کے دوران وزیراعظم نے ایرانی قیادت کی دانشمندی اور دور اندیشی کو سراہا، جنہوں نے جنگ بندی پر آمادگی ظاہر کی۔

وزیراعظم کی جانب سے ایران اور امریکا کے درمیان رواں ہفتے اسلام آباد میں مذاکرات کی میزبانی کی پیشکش بھی کی گئی، جسے ایرانی صدر نے قبول کر لیا۔

وزیراعظم شہباز شریف نے ایران کے سپریم لیڈر آیت اللہ مجتبیٰ خامنہ ای کے لیے بھی اپنے احترام اور نیک تمناؤں کا اظہار کیا۔

صدر مسعود پزشکیان نے وزیراعظم کا شکریہ ادا کرتے ہوئے ایران اور امریکا کے درمیان عارضی جنگ بندی کے قیام میں پاکستانی قیادت کی کوششوں کو سراہا اور پاکستانی عوام کے لیے نیک خواہشات کا اظہار کیا۔

پاکستان نوبل انعام کا مستحق، ایران امریکا جنگ بندی کا عالمی خیر مقدم

ایرانی صدر نے تصدیق کی کہ ایران اسلام آباد میں ہونے والے مذاکرات میں شرکت کرے گا۔ دونوں رہنماؤں نے خطے میں امن و استحکام کے فروغ کے لیے باہمی رابطے میں رہنے پر بھی اتفاق کیا۔