پیٹرول مہنگا ہونے کے بعد گڈز ٹرانسپورٹرز نے کرایوں میں 60 فیصد اضافہ کر دیا

پاکستان گڈز ٹرانسپورٹ الائنس کے صدر ملک شہزاد اعوان نے پیٹرولیم مصنوعات کی قیمتوں میں حالیہ اضافے پر سخت ردعمل دیتے ہوئے ملک بھر میں ٹرانسپورٹ کرایوں میں 60 فیصد اضافے کا اعلان کر دیا ہے۔

اپنے بیان میں انہوں نے کہا کہ پیٹرولیم مصنوعات کی قیمتوں میں اضافے کی ملک بھر کے ٹرانسپورٹرز شدید مذمت کرتے ہیں اور اس فیصلے سے مہنگائی میں مزید اضافہ ہوگا۔ ان کا کہنا تھا کہ گزشتہ تین ماہ کے دوران پیٹرول کی قیمت میں 205 روپے جبکہ ڈیزل کی قیمت میں 263.78 روپے کا اضافہ کیا گیا، جس نے ٹرانسپورٹ سیکٹر کو شدید متاثر کیا ہے۔

ملک شہزاد اعوان نے کہا کہ وفاقی حکومت کی پالیسیوں کے باعث لاکھوں افراد بے روزگار ہو رہے ہیں، جبکہ کاروباری سرگرمیاں بھی متاثر ہو رہی ہیں۔ انہوں نے مطالبہ کیا کہ اگر حکومت کیلئے پیٹرولیم مصنوعات کی قیمتوں میں اضافہ ناگزیر ہے تو کم از کم ٹول ٹیکس اور دیگر ٹیکسز ختم کیے جائیں۔

انہوں نے مزید کہا کہ موٹروے پولیس اور ٹریفک پولیس کے جرمانے بھی ختم کیے جائیں تاکہ ٹرانسپورٹرز کو کچھ ریلیف مل سکے۔ ان کا کہنا تھا کہ موجودہ حالات میں ٹرانسپورٹ سیکٹر ہی ملک کی امپورٹ، ایکسپورٹ اور کاروباری سرگرمیوں کو سہارا دے رہا ہے۔

انہوں نے خبردار کیا کہ اگر وفاقی حکومت نے اپنی پالیسیوں پر نظرثانی نہ کی تو ملک بھر میں ٹرانسپورٹ کا پہیہ رک سکتا ہے۔ ساتھ ہی انہوں نے کہا کہ آئندہ کے لائحہ عمل کا اعلان ملک بھر کی ٹرانسپورٹ ایسوسی ایشنز سے مشاورت کے بعد کیا جائے گا۔