امریکا ایران جنگ سے پیش آنیوالی مشکل صورتحال پاکستان بڑی کامیابی سے حل کر رہا ہے، وزیر اعظم

اسلام آباد:وزیر اعظم شہباز شریف نے عالمی منڈی میں قیمتوں میں اضافے کے اثرات سے نمٹنے کے لیے جامع پالیسی تیار کرنے کی ہدایت کر دی۔

وزیر اعظم شہباز شریف کی زیر صدارت خطے کی کشیدہ صورتحال کے پیش نظر ملک پر ممکنہ مالیاتی و معاشی اثرات سے نمٹنے کیلئے اہم جائزہ اجلاس منعقد ہوا۔ جس میں درمیانی اور طویل مدتی حکمت عملی مرتب کرنے کا فیصلہ کیا گیا۔

اجلاس سے خطاب کرتے ہوئے وزیر اعظم شہباز شریف نے کہا کہ دنیا کے کئی ممالک کو موجودہ حالات میں اشیائے ضروریہ کی طلب و رسد برقرار رکھنے میں مشکلات کا سامنا ہے۔ تاہم پاکستان اس چیلنج سے مؤثر انداز میں نمٹ رہا ہے۔

انہوں نے متعلقہ اداروں کی بروقت کارروائیوں کو سراہتے ہوئے کہا کہ ہنگامی صورتحال سے بچاؤ کے لیے کیے گئے اقدامات قابل تحسین ہیں۔

وزیر اعظم نے ہدایت کی کہ عالمی منڈی میں قیمتوں میں اضافے کے اثرات سے نمٹنے کے لیے جامع پالیسی تیار کی جائے۔ جس میں معیشت کے تمام شعبوں کو مدنظر رکھا جائے۔

انہوں نے زور دیا کہ پیداواری لاگت میں اضافے کے باعث برآمدات اور مجموعی پیداوار پر منفی اثرات کو کم سے کم کیا جائے۔

شہباز شریف نے کہا کہ زراعت اور صنعت کے شعبوں کو درپیش چیلنجز سے نمٹنے کے لیے دستیاب وسائل اور مواقع کو بھرپور انداز میں استعمال کیا جائے۔ جبکہ اشیائے ضروریہ کی طلب و رسد کا توازن ہر صورت برقرار رکھا جائے۔

یہ بھی پڑھیں: پاکستان کی امریکا ایران جنگ کے خاتمے کی سفارتی کوششوں کیخلاف بھارت کا منفی پروپیگنڈا جاری ہے، دفترخارجہ

اجلاس کو بریفنگ میں بتایا گیا کہ متعلقہ وزارتیں اور ادارے روزانہ کی بنیاد پر صورتحال کا جائزہ لے رہے ہیں۔ اور باہمی تعاون سے اقدامات جاری ہیں۔ وزیراعظم نے اس عزم کا اعادہ کیا کہ حکومت معیشت کے استحکام اور عوامی فلاح کے لیے تمام ضروری اقدامات جاری رکھے گی۔