میرپورخاص تعلیمی بورڈ، ڈھائی ہزار سے زائد مارک شیٹس اور سرٹیفکیٹس منسوخ

میرپورخاص: تعلیمی بورڈ میرپورخاص نے جعلی دستاویزات کے خلاف بڑی کارروائی کرتے ہوئے ڈھائی ہزار سے زائد مارک شیٹس اور سرٹیفکیٹس منسوخ کر دیئے۔

چیئرمین میرپورخاص تعلیمی بورڈ نے باضابطہ اعلامیے میں تصدیق کی ہے کہ متعدد کیسز میں جعلی سرٹیفکیٹس کے اجرا اور امتحانی نتائج میں ردوبدل کے شواہد سامنے آئے۔ جس کے بعد یہ سخت اقدام اٹھایا گیا۔

بورڈ حکام کے مطابق تحقیقات کے دوران ایسے طلبا اور امیدواروں کی نشاندہی کی گئی جن کے امتحانی ریکارڈ میں جعلسازی یا غیر قانونی تبدیلیاں کی گئی تھیں۔ اس سلسلے میں چیئرمین نے متاثرہ امیدواروں کے سیٹ نمبرز کے ساتھ مکمل فہرست بھی جاری کر دی۔ تاکہ متعلقہ ادارے اور امیدوار صورتحال سے آگاہ رہیں۔

تعلیمی بورڈ کا کہنا ہے کہ منسوخ کیے گئے سرٹیفکیٹس اور مارک شیٹس اب کسی بھی تعلیمی یا سرکاری مقصد کے لیے قابل قبول نہیں ہوں گے۔ جبکہ معاملے میں ملوث افراد اور عناصر کے خلاف مزید قانونی کارروائی بھی زیر غور ہے۔

یہ بھی پڑھیں: میرپور بورڈ نے دہم کے سالانہ امتحانات کا اعلان کر دیا، رول نمبر سلپس بھی جاری

حکام نے واضح کیا کہ تعلیمی نظام کی شفافیت اور میرٹ کو برقرار رکھنے کے لیے ایسے اقدامات ناگزیر ہیں۔ اور آئندہ بھی جعلی اسناد کے خلاف کارروائیاں جاری رکھی جائیں گی۔