پاکستان ریلوے نے نیا ریکارڈ قائم کر دیا

لاہور: عید الفطر کے موقع پر مسافروں کے غیر معمولی رش نے پاکستان ریلویز کی آمدن میں نمایاں اضافہ کر دیا۔ جہاں صرف 3 دنوں میں ادارے نے ریکارڈ کمائی حاصل کی۔

ریلوے حکام کے مطابق عید کے تینوں دن آمدن میں مسلسل اضافہ دیکھا گیا۔ پہلے روز تقریباً 11 کروڑ روپے، دوسرے دن 17 کروڑ روپے جبکہ تیسرے دن 20 کروڑ روپے سے زائد کی آمدن ریکارڈ کی گئی۔

ترجمان کے مطابق صرف ایک ہفتے کے دوران مسافر ٹرینوں سے ریلوے کو ایک ارب روپے سے زائد آمدن حاصل ہوئی۔ جو حالیہ برسوں میں ادارے کی کارکردگی میں واضح بہتری کی علامت قرار دی جا رہی ہے۔

وفاقی وزیر ریلوے حنیف عباسی نے اس کامیابی کو مثبت حکمت عملی، خصوصی عید ٹرینوں اور بہتر انتظامات کا نتیجہ قرار دیتے ہوئے ریلوے عملے کی کارکردگی کو سراہا۔

انہوں نے کہا کہ مسافروں کو بہتر سہولیات فراہم کرنا اور ریلوے انفراسٹرکچر کو مضبوط بنانا حکومت کی ترجیحات میں شامل ہے۔ اسی سلسلے میں کراچی سے روہڑی تک ریلوے ٹریک کو جدید خطوط پر اپ گریڈ کرنے کا منصوبہ بھی جاری ہے۔ جسے آئندہ ڈھائی سے تین برس میں مکمل کرنے کا ہدف مقرر کیا گیا ہے۔

یہ بھی پڑھیں: صدر مملکت نے پاک فوج کے افسران و جوانوں کو اعلیٰ اعزازات دینے کی منظوری دیدی

وزیر ریلوے کے مطابق ٹریک کی اپ گریڈیشن سے نہ صرف ٹرینوں کی رفتار اور وقت کی پابندی میں بہتری آئے گی۔ بلکہ مسافروں کو محفوظ اور آرام دہ سفر کی سہولت بھی میسر آئے گی۔ جس سے ریلوے کی آمدن میں مزید اضافہ متوقع ہے۔