پنجاب میں دفعہ 144 میں توسیع کر دی گئی

لاہور: پنجاب میں دفعہ 144 کے نفاذ میں مزید 7 روز کی توسیع کر دی گئی۔ 14 مارچ تک اجتماعات اور مظاہروں پر پابندی ہو گی۔

محکمہ داخلہ پنجاب نے اجتماعات، جلوسوں اور مظاہروں پر پابندی کا نوٹیفکیشن جاری کر دیا۔ جس کے مطابق دفعہ 144 میں توسیع کا نفاذ دہشتگردی کے ممکنہ خطرات اور امن عامہ کو لاحق خدشات کے باعث کیا گیا ہے۔

نوٹیفکیشن کے مطابق صوبے بھر میں 4 یا اس سے زائد افراد کے عوامی اجتماع، جلوسوں اور مظاہروں پر پابندی عائد رہے گی۔ جبکہ عوامی مقامات پر بغیر اجازت اجتماع منعقد کرنے کی بھی اجازت نہیں ہو گی۔

محکمہ داخلہ کے مطابق عوامی مقامات پر ہر قسم کے اسلحے کی نمائش اور استعمال پر بھی پابندی عائد کر دی گئی ہے۔ تاہم قانون نافذ کرنے والے اداروں کے اہلکار دوران ڈیوٹی اس پابندی سے مستثنیٰ ہوں گے۔

نوٹیفکیشن میں واضح کیا گیا ہے کہ شادی بیاہ، جنازوں اور تدفین سے متعلق اجتماعات اس پابندی میں شامل نہیں ہوں گے۔ اس کے علاوہ سرکاری اور نیم سرکاری دفاتر کے اجلاس اور عدالتوں کی کارروائیاں بھی پابندی سے مستثنیٰ رہیں گی۔

یہ بھی پڑھیں: پاک فوج نے چمن سیکٹر پر فتنہ الخوارج کی دراندازی کی کوشش ناکام بنا دی ، ایک دہشتگرد ہلاک

محکمہ داخلہ کے مطابق انٹیلی جنس رپورٹس میں خدشہ ظاہر کیا گیا ہے کہ حساس اجتماعات دہشتگردی یا فرقہ وارانہ کارروائیوں کا ہدف بن سکتے ہیں۔ اسی لیے احتیاطی اقدامات کے طور پر پابندی میں توسیع کی گئی ہے۔