اسلام آباد میں غیر رجسٹرڈ ریستورانوں کے خلاف کریک ڈاؤن کا آغاز

وفاقی دارالحکومت میں غیر رجسٹرڈ فوڈ پوائنٹس اور ریسٹورنٹس کے مالکان کے لیے اسلام آباد فوڈ اتھارٹی نے بڑا اعلان کر دیا ہے۔

اس اعلان سے قبل ہی انتظامیہ نے اسلام آباد کی جناح سپر مارکیٹ میں واقع مشہور ‘کابل ریسٹورنٹ’ کو جزوی طور پر سیل کر دیا۔ ریسٹورنٹ پر کیش لیس پے منٹ قواعد کی خلاف ورزی کرنے کا الزام ہے۔ شہریوں نے سوشل میڈیا پر معاملہ اٹھایا تھا کہ یہ ریسٹورنٹ کارڈ سے پے منٹ نہیں لیتا۔

اتھارٹی نے فیصلہ کیا ہے کہ یکم دسمبر سے شہر بھر میں غیر رجسٹرڈ فوڈ پوائنٹس اور ریسٹورنٹس کے خلاف سخت کریک ڈاؤن شروع کیا جائے گا۔

اتھارٹی کے مطابق تمام ہوٹلوں، ریسٹورنٹس، بیکریز، کیفیز، فاسٹ فوڈ مراکز اور دیگر فوڈ پوائنٹس کے لیے 30 نومبر تک رجسٹریشن لازمی قرار دی گئی ہے۔ اس تاریخ کے بعد کسی بھی غیر رجسٹرڈ کاروبار کو کام کرنے کی اجازت نہیں ہوگی۔

Kabul Restaurant open space sealed for not adhering to cashless SOPs.
Let’s move towards digitisation and cashless economy
Good work by MCI @dranamfatima @CDAthecapital @ShazaFK https://t.co/ygUGZ7WGWy pic.twitter.com/7PJVGtQMNi

— Muhammad Ali Randhawa (@RandhawaAli) November 7, 2025

ڈائریکٹر فوڈ اتھارٹی نے واضح کیا ہے کہ یکم دسمبر سے روزانہ کی بنیاد پر انسپکشنز کی جائیں گی اور جن فوڈ پوائنٹس یا ریسٹورنٹس کی رجسٹریشن مکمل نہیں ہوگی انہیں فوری طور پر سیل کر دیا جائے گا۔ خلاف ورزی کی صورت میں بھاری جرمانے بھی عائد کیے جائیں گے۔

انہوں نے مزید کہا کہ فوڈ سیکٹر میں حفظانِ صحت کے اصولوں پر عمل درآمد اور صارفین کے تحفظ کے لیے یہ اقدام ناگزیر ہے۔ ان کا کہنا تھا کہ رجسٹریشن کے بغیر کاروبار چلانے والے مراکز نہ صرف غیر قانونی ہیں بلکہ عوام کی صحت کے لیے بھی خطرہ ثابت ہو سکتے ہیں۔

ڈائریکٹر فوڈ اتھارٹی نے تمام فوڈ پوائنٹس، ریسٹورنٹس اور ہوٹل مالکان سے درخواست کی ہے کہ وہ 30 نومبر تک اپنی رجسٹریشن مکمل کر کے ثبوت اتھارٹی کے ریکارڈ میں جمع کرائیں، تاکہ کارروائی سے بچا جا سکے۔

رجسٹریشن کے لیے آن لائن اور آف لائن دونوں سہولیات دستیاب ہیں، اور فوڈ اتھارٹی نے اس حوالے سے شہریوں کی رہنمائی کے لیے خصوصی ہیلپ لائن بھی قائم کر دی ہے۔