کامیڈی فلم ’بھوت بنگلہ‘ کی شوٹنگ کے دوران ہیرو زخمی، ویڈیو وائرل

بالی ووڈ کے کھلاڑی اکشے کمار اپنی نئی ہارر کامیڈی فلم ’بھوت بنگلہ‘ کی شوٹنگ کے دوران ایکشن اسٹنٹ کرتے ہوئے زخمی ہو گئے ہیں۔

اس واقعے کی ویڈیو سوشل میڈیا پر تیزی سے وائرل ہو رہی ہے، جس میں اداکار کو ایک خطرناک سین فلماتے ہوئے چوٹ لگتے دیکھا جا سکتا ہے۔

پروڈکشن ٹیم کی جانب سے شیئر کی گئی اس ویڈیو نے مداحوں میں تشویش پیدا کر دی ہے، تاہم ابھی تک یہ واضح نہیں ہو سکا کہ یہ واقعہ کس مقام پر پیش آیا اور اداکار کی چوٹ کتنی نوعیت کی ہے۔ اکشے کمار فلمی صنعت میں اپنے خطرناک اسٹنٹس خود کرنے کے لیے مشہور ہیں اور وہ مارشل آرٹس میں باقاعدہ تربیت یافتہ ہیں۔

 

View this post on Instagram

 

A post shared by Ashwani Kumar (@borntobeashwani)

اپنے حالیہ انٹرویو میں اکشے کمار نے فلموں میں وی ایف ایکس (VFX) اور مصنوعی ذہانت (AI) کے بڑھتے ہوئے استعمال پر ناپسندیدگی کا اظہار کیا تھا۔ ان کا کہنا تھا کہ وہ حقیقی ایکشن پر یقین رکھتے ہیں کیونکہ ٹیکنالوجی کے ذریعے بنائے گئے مناظر فرضی لگتے ہیں۔ یہی وجہ ہے کہ وہ ‘بھوت بنگلہ’ میں بھی حقیقی اسٹنٹس کو ترجیح دے رہے تھے۔

واضح رہے کہ اس فلم کے ذریعے اکشے کمار اور معروف ہدایت کار پریہ درشن کی جوڑی 15 سال بعد بڑے پردے پر واپسی کر رہی ہے۔ اس سے قبل یہ جوڑی ’ہیرا پھیری‘، ’بھول بھولیاں‘ اور ’بھاگم بھاگ‘ جیسی بلاک بسٹر فلمیں دے چکی ہے، جس کی وجہ سے شائقین کو اس نئی فلم سے بڑی توقعات وابستہ ہیں۔