قلات میں زلزلے کے جھٹکے،شدت 4.8 ریکارڈ

بلوچستان کے ضلع قلات میں زلزلے کے جھٹکے محسوس کیے گئے جس کے باعث شہریوں میں خوف و ہراس پھیل گیا اور لوگ کلمہ طیبہ کا ورد کرتے ہوئے گھروں اور دفاتر سے باہر نکل آئے۔

زلزلہ پیما مرکز کے مطابق زلزلے کی شدت ریکٹر اسکیل پر 4.8 ریکارڈ کی گئی، جبکہ اس کی گہرائی 11 کلومیٹر زیرِ زمین تھی۔ زلزلے کا مرکز قلات سے تقریباً 50 کلومیٹر جنوب مشرق میں واقع تھا۔

خاران اور گرد و نواح میں 3.6 شدت کا زلزلہ

عینی شاہدین کا کہنا ہے کہ زلزلے کے جھٹکے اچانک محسوس ہوئے جس سے گھروں کی دیواریں اور کھڑکیاں لرز اٹھیں۔ کئی علاقوں میں لوگ خوف کے باعث کھلے مقامات پر جمع ہوگئے اور کافی دیر تک صورتحال معمول پر آنے کا انتظار کرتے رہے۔

ضلعی انتظامیہ کے مطابق ابتدائی اطلاعات کے مطابق زلزلے کے نتیجے میں کسی قسم کے جانی یا مالی نقصان کی اطلاع موصول نہیں ہوئی۔ تاہم متعلقہ ادارے صورتحال پر کڑی نظر رکھے ہوئے ہیں اور کسی بھی ہنگامی صورتحال سے نمٹنے کے لیے الرٹ ہیں۔

تین دن میں بڑی تباہی، ہالینڈ کے زلزلہ پیما ماہر کی بڑی پیشگوئی

ریسکیو ذرائع کا کہنا ہے کہ کسی بھی ممکنہ ایمرجنسی سے نمٹنے کے لیے ٹیموں کو تیار رکھا گیا ہے، جبکہ عوام سے بھی اپیل کی گئی ہے کہ وہ غیر ضروری خوف و ہراس سے گریز کریں اور کسی بھی ہنگامی صورتحال میں متعلقہ اداروں سے فوری رابطہ کریں۔