مردوں کیخلاف متنازع بیان پر جویریہ سعود تنقید کی زد میں آگئیں

اداکارہ اور میزبان جویریہ سعود نے ایک ٹی وی شو میں شادی شدہ زندگی اور غیر ازدواجی تعلقات سے متعلق ایسا بیان دے دیا جس نے سوشل میڈیا پر ہلچل مچا دی۔

جویریہ سعود نے کہا کہ اکثر ایسے جوڑے جو بظاہر “پرفیکٹ” دکھائی دیتے ہیں، ان کی زندگی کے پیچھے چھپے ہوئے مسائل ہوتے ہیں۔

انہوں نے دعویٰ کیا کہ اگر کوئی شوہر اپنی بیوی کا ضرورت سے زیادہ خیال رکھے، تحفے دے، اور حد سے زیادہ نرمی دکھائے، تو ممکن ہے کہ اس کے دوسری عورتوں کیساتھ بھی تعلقات ہوں۔

انہوں نے مزید وضاحت دیتے ہوئے کہا کہ ایسا شوہر یہ سب اس لیے کرتا ہے تاکہ بیوی کو شک نہ ہو، تحفے دے کر اور خیال رکھ کر اعتماد حاصل کرتا ہے۔”

جویریہ نے بات کو ہلکے انداز میں اپنے ذاتی تجربے سے جوڑتے ہوئے کہا کہ اگر میرا شوہر سعود کبھی زیادہ پیار سے بات کرے، تو میں فوراً پوچھتی ہوں، کوئی کام ہے؟ کوئی مسئلہ ہے یا کوئی چکر چل رہا ہے؟ بعد میں پتا چلتا ہے بچوں یا گھر کے کسی کام کی بات ہوتی ہے۔

ان کے اس بیان کے بعد سوشل میڈیا صارفین میں ملا جلا ردعمل دیکھنے میں آیا۔ کچھ صارفین نے اداکارہ کو آڑے ہاتھوں لیتے ہوئے ان پر دیگر خواتین کے “دماغ خراب” کرنے کا الزام لگا دیا۔

ایک صارف نے مذاق اڑاتے ہوئے کہا کہ “اس کا مطلب میرا شوہر وفادار ہے کیونکہ وہ کبھی تحفہ نہیں دیتا”

کچھ صارفین نے جویریہ کے بیان کو غیر منطقی اور غیر سنجیدہ قرار دیا۔ ایک نے لکھا کہ “کتنی جہالت ہے، مطلب اب شوہر خیال بھی نہ رکھے۔”

ہنسی مذاق سے ہٹ کر اکثر صارفین نے جویریہ کو تنقید کا نشانہ بنایا اور کہا کہ وہ رشتوں کو غیر ضروری شک کی نظر سے دیکھنے کی تبلیغ کر رہی ہیں۔