اسلام آباد: وفاقی وزیر منصوبہ بندی احسن اقبال نے کہا ہے کہ پاکستان تحریک انصاف (پی ٹی آئی) نے اپنے دور حکومت میں ریکارڈ قرضے لے کر پاکستان کو معاشی دلدل میں پھنسا دیا۔
وفاقی وزیر منصوبہ بندی احسن اقبال نے سالانہ منصوبہ بندی رابطہ کمیٹی اجلاس سے خطاب کرتے ہوئے کہا کہ مسلم لیگ ن کے گزشتہ دور میں ترقیاتی بجٹ ایک ہزار ارب روپے تھا جو پی ٹی آئی دور میں 500 ارب روپے رہ گیا۔
انہوں نے کہا کہ پاکستان کے ترقیاتی منصوبوں کے لیے ہمارے پاس وسائل بہت کم ہیں اور اس وقت ملک کو موسمیاتی تبدیلیوں کے بدترین اثرات کا سامنا بھی کرنا پڑا جبکہ گزشتہ 4 سال میں ملکی معیشت کو شدید نقصان پہنچایا گیا۔
یہ بھی پڑھیں: اورنج لائن ٹرین کے اسٹیشنز پر کمرشل شوٹ کرنے کیلئے فیس ادا کرنا ہوگی
احسن اقبال نے کہا کہ سی پیک پاکستان کے لیے گیم چینجر منصوبہ ہے جبکہ اے پی سی سی میں ترقیاتی بجٹ کی مد میں ساڑھے 9 سو ارب ہو گا، ڈیڑھ سو ارب روپے کے پبلک پرائیویٹ پارٹنر شپ کے تحت منصوبے شروع ہوں گے۔
انہوں نے کہا کہ ہمیں اپنے ملک کی خواتین اور نوجوانوں کو بااختیار بنانا ہے اور پاکستان کے پسماندہ ترین اضلاع کو دیگر اضلاع کے برابر لانا ہو گا۔ زرعی شعبے کی بہتری سے گرین انقلاب ہماری اولین ترجیح ہے اور توانائی کے مسئلے پر قابو پانے کے لیے شمسی توانائی کے شعبے پر توجہ دینا ہو گی۔
