سڈنی: آسٹریلیا میں پیدا ہونے والے بچھڑے کے جسم پر قدرتی طور پر ہنسنے والی “سمائلی” بنی ہوئی ہے۔
غیر ملکی خبر رساں ایجنسی کے مطابق آسٹریلیا میں پیدا ہونے والا ہالینڈ نسل کے بچھڑے کے جسم پر سمائلی بننے کے باعث لوگوں نے اس کا نام “ہیپی” رکھ دیا۔
یہ ہیپی ویسٹ جپس لینڈ کے علاقے ریل بروک کے ایک فارم میں پیدا ہوا جہاں ہر سال تقریباً 700 بچھڑوں کو پالا جاتا ہے۔ ہیپی بھی اسی فارم میں پیدا ہوا جسے دیکھنے کے لیے لوگوں کی بڑی تعداد دور دور سے آ رہی ہے۔
فارم مالک میگن کوسٹر کے مطابق ہمارے ہاں پیدا ہونے والے بچھڑوں کے جسم پر اکثر مختلف قسم کے نشانات پائے جاتے ہیں تاہم ہنسنے والی یہ سمائلی پہلی دفعہ سامنے آئی ہے۔
انہوں نے کہا کہ بچھڑے کے جسم پر سمائلی کے نشان نے ان کے چہرے پر بھی مسکراہٹ بکھیر دی ہے۔ اسے دیکھنے آنے والے لوگ ہاتھ لگا کر بھی چیک کرتے ہیں کہ کہیں یہ مصنوعی تو نہیں ہے۔
یہ بھی پڑھیں: خیمے میں سونے والے لڑکے نے لاکھوں ڈالر جمع کر لیے
ان کا کہنا تھا کہ ہمارے فارم کے ملازمین اسے پالنے کی خواہش رکھتے ہیں اس لیے اسے فروخت نہیں کیا جائے گا بلکہ اسے فارم پر ہی پالا جائے گا۔
