اسلام آباد سے آج صبح اغوا ہونے والے سینئر صحافی مطیع اللہ جان بازیاب ہو گئے ہیں اور وہ اپنے بھائی کے ہمراہ گھر پہنچ گئے ہیں۔
ذرائع کے مطابق مطیع اللہ جان کو اغواکار فتح جنگ کے قریب چھوڑ گئے تھے۔
خیال رہے کہ اسلام آباد ہائی کورٹ نے سینئر صحافی مطیع اللہ جان کو بازیاب کرانے کا حکم دیا تھا۔
چیف جسٹس اسلام آباد ہائی کورٹ جسٹس اطہر من اللہ نے مغوی کے بھائی کی درخواست پر احکامات جاری کیے۔
عدالت نے سیکرٹری داخلہ، چیف کمشنر اور آئی جی پولیس کو نوٹس جاری کرتے ہوئے حکم دیا تھا کہ مطیع اللہ جان کو بازیاب نہیں کرایا جاسکا تو فریقین کل ذاتی حیثیت میں پیش ہوں۔
عدالت نے کہا کہ درخواست گزار کے مطابق صحافی مطیع اللہ جان کو دن دیہاڑے اسلام آباد سے اغوا کیا گیا،یہ مبینہ طور پر جبری گمشدگی کا مقدمہ ہے۔انتظامیہ پیش ہوکر بتائے کیوں نا ایسے واقعات کے ذمہ داروں کے خلاف کاروائی کی جائے۔
