اسلام آباد: وزیرِ اعظم عمران خان نے تمام وزارتوں کی سہ ماہی کارکردگی کا جائزہ لینے کا فیصلہ کرلیا۔
وزیرِ اعظم آفس کے ذرائع نے ہم نیوز کو بتایا کہ نومبر 2018 میں تمام وزارتوں کی جانب سے کابینہ کے سامنے پیش کیے گئے اہداف کی روشنی میں سہ ماہی کارکردگی کا جائزہ لیا جائے گا۔
سہ ماہی رپورٹ مرتب کرنے کے لئے وزیرِ اعظم آفس کی جانب سے تمام وزارتوں کو مراسلہ ارسال کردیا گیا ہے۔
مزید پڑھیں: وزیراعظم کا وفاقی کابینہ میں تبدیلی نہ کرنے کا فیصلہ
ذرائع کے مطابق تمام وزارتوں کو سہ ماہی کارکردگی کی رپورٹ مرتب کرنے کے لئے دو ہفتوں کا وقت دیا گیا ہے، ہر وزارت کو اب تک کی کارکردگی رپورٹ پیش کرنے کے لئے 30 منٹ کا وقت دیا جائے گا جس کے بعد سوال و جواب کا سیشن ہوگا۔
سہ ماہی کارکردگی کا جائزہ لینے کے لیے وزیرِ اعظم آفس کی جانب سے طے شدہ فارمیٹ تمام وزارتوں کو ارسال کر دیا گیا ہے۔
وزارتوں کے نام مراسلہ میں کہا گیا ہے کہ اہداف کا تعین اور باقاعدگی سے کارکردگی کا جائزہ لیا جانا بہتر اور موثر حکومت کو یقینی بنانے میں کلیدی کردار ادا کرتے ہیں۔
خیال رہے کہ گزشتہ سال دسمبر میں سرکاری خبر رساں ادارے اے پی پی نے اپنی ایک رپورٹ میں بتایا تھا کہ وفاقی کابینہ نے ہر تین ماہ بعد وزارتوں کی کارکردگی کا باقاعدگی سے جائزہ لینے کا فیصلہ کیا ہے۔
یہ فیصلہ کابینہ کے ایک اجلاس میں لیا گیا تھا۔ وزیراعظم آفس سے جاری بیان کے مطابق خصوصی اجلاس میں 26 وزارتوں کی کارکردگی کا جائزہ لیا گیا۔
